這麼近 那麼遠

英超上周日煞科， 曼城「正路」以大熱姿態封王。齋睇結果， 實難以想像爭標過程是何等的峰回路轉，高潮迭起。

本季最大驚喜，當要數到利物浦的爆發。由開季時無人睇好，到季尾一度成為奪冠熱門，形勢大好。由謝拉特的熱血爆喊，到阿蘇的失望痛哭，短短數周，從天堂跌落地獄。

我經常覺得，紅軍球迷的命運，就同股市裏的散戶一樣。不管作戰過程是怎樣的精妙絕倫，經歷完一輪過山車，結果永遠都是「又喺咁」。今次又喺咁？ 是的，又喺咁，即那份熟悉得令人感到無地自容的尷尬及失望。

千倍認購的熱爆新股？ 反地心吸力的新經濟股？ 阿爺送大禮的滬港通概念股？ 追呀、殺呀、劈呀、搏鬥一輪，過程緊張兼刺激。結果？ 又喺咁。利記幾時先能夠真正蘇醒，就等同於散戶何時才能夠真正學乖一樣，永遠是個謎。

防守也是遊戲一部分

利記由盛轉衰的轉捩點，當然是主場敗給車仔的賽事。計得分，本來和波拿一分已能掌握奪標的主動權，但球隊連勝後心雄， 貪勝不知輸。眼見車仔排出求和的巴士陣勢，球隊還盲頭蒼蠅般死衝亂攻，最後被對手突襲成功。利記領隊羅渣士賽後還未瞓醒，批評對手打拉布。

喂，人地悶住贏，點都好過型住輸。面對戰術大師摩連奴及善守的車路士，還夾硬強攻，事後回看，輸波實在是理所當然的了。

散戶往往在贏得少許甜頭之後，就會殺得性起，變得有前冇後。由二、三線炒到六、七線。莊家股、殼股、仙股，愈垃圾愈炒，之前贏多多都不夠輸。踢波同炒股一樣，落場前最好先看清對手是誰，自己夠班未。謹記防守也是遊戲的一部分。

紅軍迷及散戶或者唯一可以慶幸的，就是球季年年有，股市日日開，輸完可以再黎，斬了的手指也可以生翻。

下周西甲煞科， 又要鬥到最後一輪， 好睇過戲，但結果會否「又喺咁」呢？