神抄兄弟

那朝早雲遊（484）斥資5億多港幣收購《神魔之塔》開發商20%股權的報道一出街，手機即時比短訊塞滿。

又一個寫App發達的傳奇故事，令大家又羨慕，又妒忌。

今次回響更大，是因為故事距離大家更近。香港人，科大仔，他們就好像你同我身邊的朋友，又甚至乎，好似你同我。

一將功成萬骨枯。車，有九萬個衰咗無人講啫。的確，但世事不都是那樣的嗎? 是才華抑是運氣? 最窮嗰陣戶口得番10蚊雞，夠晒話題性。嘗試，然後堅持到底，比任何事都重要。

「呢嗰idea我幾年前都諗到啦，只不過…」。 這句對白，大家應該講唔少，亦聽過很多。問題是這些所謂的idea永遠只能停留在腦海裏面，直到他朝給別人成功做出來為止。

專家分析多數唔掂

最近無線有個創業節目，叫大家拿建議書給專家分析，然後泵水資助實行。我希望這個節目將來能跟進每個項目的結果。我的猜想是，專家認為可行的，多數不行。大家一致判死刑的，反而有機會成功。

因為坐在冷氣房諗得到的，通常都不會是重點。分析一輪，諗一大餐，九成晒氣。世界在變， 一切你預設的條件，都不停在急速轉變。誰一開始想到神魔會成功效法 Facebook？人造蛋？唔好搞笑。

就好似分析員鍾意問上市公司拿guidance一樣。營業額要guidance，開店又要guidance。大佬，市場日日變，唔通到時明知行唔通，都要跟住俾你個guidance行咩?
做生意者，「生」才是重點。

拓海的飄移是靠每日晨早送豆腐砌返嚟的，而不是躲在實驗室用物理公式算出來的。
點樣低撈，點樣高抄，勁啦勁啦。講多無謂，落場劈完先講。